Njëherë e në një kohë, kusarët e Qytetit të Parë të Botës, pasi u pasuruan mjaft, vendosën të rregullonin jetën e tyre. Qerthulluan, pra, të varfërit e qytetit e, pasi i mblodhën te sheshi kryesor, i urdhëruan: “Duart lart! Nuk kemi ndërmend t’ju rrëmbjejmë as lopatat, as kazmat, as qeset, as trastat ku mbani bukë e djathë, as këmishët tuaja zhele – zhele plot morra, as kasollat pa dysheme, ku hyn ujët nga të katër anët. Jeni të lirë!...

Njëherë e në një kohë, kusarët e Qytetit të Parë të Botës, pasi u pasuruan mjaft, vendosën të rregullonin jetën e tyre. Qerthulluan, pra, të varfërit e qytetit e, pasi i mblodhën te sheshi kryesor, i urdhëruan: “Duart lart! Nuk kemi ndërmend t’ju rrëmbjejmë as lopatat, as kazmat, as qeset, as trastat ku mbani bukë e djathë, as këmishët tuaja zhele – zhele plot morra, as kasollat pa dysheme, ku hyn ujët nga të katër anët. Jeni të lirë! Jeni të lirë të jetoni sipas qejfit, të fitoni, të kurseni, të pini e të bëheni xurxull, të kërceni, të shumoheni dhe të vdisni. Ne do ju predikojmë të vërtetën! Do ju falim një fantazi të pasur e një zemër të ndjeshme. Do ju japin edhe shpirt të pavdekshëm. Dhe kujt t’i pëlqejë, mund të shkruajë vjersha ose të zbulojë teorira të reja, të fitojë famë e lavdi. Ju do të jeni popull i plotfuqishëm. Ne vetëm do t’ju qeverisim! Ne do ju sigurojmë punë – kur të ketë… dhe, natyrisht, frytet e punës do t’i marrim ne. E që të mos dyshoni se ndoshta ne do ju bëjmë ndonjë padrejtësi, bashkë me ju, edhe ne do t’i paguajmë një lloj takes shtetit, do me thënë vetes tonë! E jo vetëm kaq. Edhe ne, edhe ju do të kemi mbi kokë po ata Perëndi, të cilët do t’ju japin përditë urdhër të punoni e të mos hani, dhe ne të rrimë gjithë ditën e ditës e do hamë sat ë ngopemi. Edhe ju, edhe ne do të kemi po ato ligje që do t’i kurdisim ne e që pastaj ju do t’i aprovoni me anë të votimit si deputetë e do t’i zbatoni si gjykatës kundër vetes suaj. Po vazhdojmë. Me qëllim që të mos na futen në vatan kusarë e hajdutë nga vende të huaja e nga dete të largët, që mund t’ju rrëmbejnë bukën e gojës e t’ju marrin me vete gratë e fëmijët tuaj, ne do ju armatosim e do ju stërvitim që të jeni në gjendje të mbroni perënditë tuaja, veten tuaj dhe zotërinë tonë, d.m.th Atdheun. Jut ë vrisni e të vriteni që të rrojmë ne. Dhe, meqenëse ju vetë kurr nuk fo të jeni në gjendje të mendoni e të gjeni cili është interesi juaj, që të mund të mbroni veten, do t’ju detyrojmë ne të bëni një gjë të tillë me pahir. Duart lart! Vetëm një gjë ju ndalojmë. Në asnjë mënyrë të mos vidhni njëri – tjetrin, sepse pastaj mësoheni e mund të na vidhni edhe ne.